Zofate Harhin I Tho Ang U-Tv.Lalnunfela

Nikhat chu college bang inah ka awm a. Rilrua thil eng eng emaw ngaihtuah pahin internet-ah ka lut kual vel  a. Mizo website pakhat a an thu chhuah ka hmuh chuan ka rilru a khawih thar hle mai. Champhaia vai DC thar ho a Republic Day an hman ho thu leh an DC thar in Mizo tawng thiam a duh thu leh Mizo tawng ngei a a thusawi a chhiar chhuah thu a ni. Tichuan ti hian ka ngaihtuah zui ta a:

Kan Mizo lehkha thiam hmasa te Central Service lamah an lut zung zung a. Chumi avang chuan Mizoramah pawh hnam dang mamawh lovin keimahni ngei kan in kaihruai thei a, chu mai bakah State pawn hmun hrang hrangah in zar pharh in Mizo zirlaite leh hnathawk a awm te tan pawh mi tangkai tak an ni. Chung kan Officer te an retire a lo hun ta, an hmun ruak luah khat turin Mizo officer ten an daih ta lo. Kan ram chhungah ngei pawh a hmun lum lai berah hnam dang officer kan chaw lut mek. Mizo zirlaite kan mawhphurhna a va sang tak em. Engvangin nge Central Service Exam-ah hian Mizo te kan tlin theih tak loh. Tun hma aiin a competition a sang zawk em ni? A chhan bul ber zawkah chuan kan tum ruh tawk loh vang niin a lang. Private School emaw SSA hnuai a Contract basis-a zirtirtu a thawh kan lungawi tawk chhung chuan kan thlen san vak a rinawm loh. Chuvangin kan tum tih ruh a ngai a ni.

Hnam in chim ralna kan vei em em a kan sawi tawp thei lo. YMA leh tlawmngai pawl hrang hrangten hnam humhalh kum an puang cham chi bawk. Vai Mistiri leh thirchhe zawngah kan tuan a. ILP an neih loh phei chuan kan in thawn hawng zung zung a, kan lunga awi ve em em chu a ni si a. Kan ram a sawrkar hna sang ber bera hnam dang awm te erawh kan hai tlat thung si. A nihna takah chuan heng vai mistiri leh thirchhe zawng ho ai hi chuan vai sawrkar hna lian thawk a lo awm te hian rin aiin bu an khuar nghet duh khawp mai. Chuvangin vai mistiri mai mai vei ai chuan kan ram a vai lehkha thiam lo lut ho hi I vei zawk teh ang u. Chuti lo zawngin kan vai officer-te hian an duh duh in min kaihruai ang a, kan hnam hi a ral thuai mai ang tih a hlauhawm.

Vai ram hmun kil khawr a kan officer te an chhuanawm hle. An tangkaizia chu a hretute vek kan ni.Vai ram lam hla taka awm ni mah ila kan thlamuanpui em em thin a, Mizo Society tan chuan Missionary ropui tak an ni. Pune context-ah ngei pawh lo en ila, kan officer Pu BT Nghinglova a retired tawh, chumi hnuah Pu Mawitea pawh a hna atanga a chawlh a hun ta. Pune Mizo awmte kan lungngai a. Anni ang hi midang lo awm leh se kan duh em em a ni. Hetia midang beisei lo hian Pune a zirlaite hian an ai ka awh dawn a ni ti thei ila a va lawmawm dawn tak em.

Central Service hi hna zahawm tak a ni a. Thuneihna an chang sangin mi ngaihsan an hlawh nasa a. Awlsam tak a hna atanga ban mai theih an ni lova, promotion pawh an hmu chak em em a ni. Tin, mahni hamthatna mai bakah mipui rawngbawlna tha tak a ni bawk. Kan ram leh hnam humhalh nan leh India ram hmun hrang hrang a Mizo awmte rawngbawl sak nan Civil Service kan mamawh tak zet a. Chutiang ni thei tur chuan Pune a Mizo Zirlai awm te hian tan I la teh ang u. Kan rual u ten an lo ti tawh a keini hian kan chhunzawm ve dawn lawm ni. Heti lamah hian Zofate harhin I tho ang u.